Deildarleiðari til TAKS á Tvøroyri

Vit fáa beinanvegin gott eyga á tær, um tú dugir at skipa fyri og stinga út í kortið. Enn betri, um tú fært fólk at trívast uttan um teg og at vera við upp á tað. Sigur tú so eisini ja til talgilding og hevur royndir ella útbúgving í leiðslu, so hevur tú hundrað prosent kjansin at gerast nýggi deildarleiðari okkara hjá TAKS á Tvøroyri.

Starvið

TAKS tryggjar samfelagnum inntøkur, umsitur veitingar og verjir samfelagið ímóti ólógligum innflutningi.

Á deildini á Tvøroyri arbeiða tíggju fólk. Sum leiðari teirra skipar tú dagliga arbeiðið á deildini og skapar motivatión og trivnað, so at deildin avrikar væl.

Deildin avgreiðir umsóknir og útgjøld í sambandi við barsilsgrunnin, arbeiðsmarknaðareftirlønargrunnin, trygdargrunnin, frítíðargrunnin og vinnusjúkugrunnin, og hon umsitur raksturin av grunnunum. Deildin viðger eisini umsóknir um ferðastuðul, rentustuðul og dupult húsarhald og ger eftirlit á fakøkinum.

Tú

Fram um alt hevur tú dirvi til at leiða, hevur ein týðiligan leiðslustíl og leggur stóran dent á samstarv og samskifti. Tú tolir at arbeiða undir trýsti og fert ikki í svart, um tað stendur eitt sindur á viðhvørt.

Tú hevur miðallanga leiðsluútbúgving ella drúgvar royndir í starvsfólkaleiðslu og elementera vitan um føroysk samfelags- og skattaviðurskifti. Tú hevur áhuga fyri lóg, og royndir í almennari umsiting eru ein fyrimunur. Tú vilt sjálvandi eisini framhaldandi førleikamenna teg á tínum økjum, og tú ert væl fyri í føroyskum, donskum og enskum.

Tú verður partur av leiðslubólkinum hjá TAKS. Her vænta vit, at tú ert virkin og framskyggin í áhaldandi arbeiðinum at menna TAKS sum stovn.

TAKS er talgilt. Borgarin kann avgreiða nógv viðurskifti við okkum við tænastum á netinum, og fleiri slíkar tænastur fara at verða mentar í komandi tíðum. Sum deildarleiðari fært tú ein týðandi leiklut í hesi menning, og tí mást tú hava áhuga fyri talgilding og duga at seta teg inní, hvussu KT-skipanir virka.

Setanartreytir

Starvið verður lønt í 35. lønarflokki eftir sáttmálanum millum Tænastumannafelagið og Fíggjarmálaráðið, uttan tó at vera tænastumannastarv. Eftirlønin er 15%. Lýkur tú treytirnar, verður starvið lønt eftir sáttmálanum millum Fíggjarmálaráðið og ávikavist Búskapar- og løgfrøðingafelagið ella Akademikarafelagið.

Starvið verður sett skjótast gjørligt. Setanarøkið er TAKS, men fevnir eisini um Fíggjarmálaráðið og stovnar undir tí. Starvsstaðurin er fyribils hjá TAKS á Tvøroyri.

Tú fert at vísa til stjóran á TAKS.

Umsóknarfreistin er sunnudagin, 28. januar 2024

Send okkum umsókn tína við lívrensli og avritum av prógvum og øðrum viðkomandi skjølum á talgildu rekruteringsskipan okkara.

Spyr meira um starvið við at ringja ella skriva til Eyðun Mørkøre, stjóra, á 35 26 00 ella á eym@taks.fo.