Leys størv
TAKS søkir eftir einum leiðara, sum vil standa á odda fyri talgildu menningini hjá stovninum.
Talan er um eitt av týdningarmestu KT-umhvørvunum í almennu fyrisitingini. Vit leita tí eftir tær, sum hevur fakliga tyngd, leiðsluligt hegni og strategiskt yvirlit, og sum við áræði vil arbeiða fyri dyggum og tryggum KT-loysnum til gagns fyri borgarar og vinnulív.
Um starvið
Sum KT-menningarleiðari hevur tú dagligu leiðsluna av KT-menningardeildini hjá TAKS. Deildin telur í dag átta starvsfólk og stendur fyri menning og viðlíkahaldi av talgildu skipanunum hjá stovninum.
Samstundis hevur tú ein sentralan leiklut í at:
• samskipa menningararbeiðið og tryggja, at tað stuðlar strategisku málum okkara
• leggja KT-verkætlanir til rættis og stýra teimum
• standa fyri einum væl skipaðum og virðisskapandi samstarvi við uttanhýsis veitarar
Ein av høvuðsuppgávunum verður at leiða arbeiðið við at nútímansgera føroysku toll- og skattaskipanina. Hetta er millum størstu KT-verkætlanir í Føroya søgu. Verkætlanin er longu farin í gongd, og í løtuni eru umleið 30 fólk frá TAKS og uttanhýsis KT-fyritøkum knýtt at henni. Uppgávan verður ein týðandi táttur í starvinum næstu fimm árini.
Tú verður partur av leiðsluni hjá TAKS og verður við til at leggja langtíðarætlanir, seta mál og gera raðfestingar fyri stovnin.
Um teg
Tú hevur viðkomandi KT-útbúgving á kandidatstigi og drúgvar royndir á økinum.
Tú skapar trivnað, álit og fakliga menning. Tú gevur starvsfólkum ábyrgd, stuðlar teimum í gerandisdegnum og setir eina greiða kós, eisini tá uppgávurnar eru stórar og samansettar.
Tað er ein fyrimunur, um tú hevur arbeitt við KT-menning, prosessmenning og verkætlanarleiðslu. Tað er eisini ein fyrimunur, um tú hevur innlit í løgfrøði og almenna fyrisiting.
Vit leggja dent á, at tú:
• samskiftir greitt og virðiliga
• hevur góð samstarvsevni og megnar at byggja brýr millum fakøki
• dugir væl at skipa arbeiðið, raðfesta og føra uppgávur á mál
• hugsar í loysnum og tekur væl grundaðar avgerðir
• tosar og skrivar føroyskt, enskt og danskt
Tú vísir rúmligheit, empati og tryggleika í samskiftinum við onnur. Samstundis hevur tú dirvi at taka avgerðir og halda fast í tí, sum tænir endamálinum best.
Setanarviðurskifti
Talan er um fulltíðarstarv. Lønin er sambært sáttmála millum Fíggjarmálaráðið og avvarandi yrkisfelag.
Setanarøkið er TAKS, men fevnir eisini um Fíggjarmálaráðið og stovnar undir tí. Starvsstaðurin er í løtuni TAKS í Havn.
Starvið verður sett skjótast gjørligt.
Send okkum umsókn tína
Tú søkir starvið við at trýsta á knøttin Søk nú, har tú skrivar kontaktupplýsingar og viðheftir umsókn, CV, prógv og onnur viðkomandi skjøl.
Umsóknarfreistin er 21. juni 2026
Vilt tú vita meira um starvið, ert tú vælkomin at seta teg í samband við Eyðun Mørkøre, stjóra, á telefon 35 26 00 ella á eym@taks.fo.
Dámar tær tøl og at hjálpa fólki? Leitar tú eftir einum læruplássi, har tú lærir nakað týdningarmikið?
So kann tað væl vera tú, sum verður nýggi lærlingurin hjá TAKS.
Vit leita eftir einum lærlingi til skattadeildina hjá okkum í Klaksvík at byrja 1. september 2026.
Um læruplássið
TAKS er ein nútímans stovnur, har faklig vitan, talgildar loysnir og borgaratænasta ganga hond í hond.
Eitt lærupláss hjá TAKS er ikki bara eitt stað at vera í tvey ár. Tað er eitt stað, sum gevur meining. Her lærir tú, hvussu samfelagið veruliga hongur saman, fært spennandi arbeiðsuppgávur og kollegar, sum hjálpa tær væl í gongd.
Hvat fert tú at gera?
Sum lærlingur hjá TAKS lærir tú skrivstovuarbeiði og borgaratænastu og fært innlit í, hvussu ein almennur stovnur er við til at fáa samfelagið at rigga í gerandisdegnum.
Tú fert serliga at arbeiða við skattaspurningum frá borgarum. Tú lærir at vegleiða fólk, svara spurningum og at avgreiða mál rætt og væl.
Eingin væntar, at tú dugir alt frammanundan. Tað er jú tí, tað eitur eitt lærupláss. Tað týdningarmesta er, at tú vilt læra, torir at spyrja og tekur ábyrgd.
Vit ímynda okkum, at tú
• hevur miðnámsútbúgving ella fært hana í summar
• tosar og skrivar føroyskt, enskt og danskt
• hevur eyga fyri tølum
• dugir væl við fólki
• arbeiðir skipað og samvitskufult
• trívist við skiftandi arbeiðsuppgávum
• ert forvitin um talgilding og nýggjar loysnir
Lærutíð
Lærutíðin veldst um, hvørja miðnámsútbúgving tú hevur:
• við búskaparbreyt er lærutíðin tvey ár
• uttan búskaparbreyt er hon tvey ár + eitt fimm viku netskeið
Setanarviðurskifti
Tú fert fyri tað mesta at arbeiða hjá TAKS í Klaksvík, men vitjar eisini aðrar deildir hjá okkum í styttri tíðarskeið. Harumframt fert tú í skúla í Danmark.
Løn og setanartreytir fylgja sáttmálanum millum Fíggjarmálaráðið og Starvsfelagið. Setanarøkið er TAKS, men fevnir eisini um Fíggjarmálaráðið og stovnar undir tí.
Send okkum eina umsókn
Tú søkir læruplássið við at trýsta á knøttin Søk nú. Har skrivar tú kontaktupplýsingar og viðheftir umsókn, lívrensl, miðnámsprógv og onnur viðkomandi skjøl.
Hevur tú ikki fingið prógvið, áðrenn umsóknarfreistin er úti, kanst tú søkja kortini.
Umsóknarfreistin er úti sunnudagin, 14. juni 2026
Vilt tú vita meira um læruplássið, ert tú vælkomin at seta teg í samband við Kristinu Hallursdóttir Laksáfoss, deildarleiðara, á khl@taks.fo ella á 35 27 17.
Dámar tær at knekka KT-nøtir, hjálpa starvsfeløgum og fáa alt at rigga? TAKS leitar eftir einum dugnaligum og tænastusinnaðum KT-supportara til KT-toymið hjá sær.
Um starvið
Saman við KT-toyminum fært tú ábyrgd av kjarnuskipanum, support, trygd og rakstri á KT-økinum hjá TAKS. Tú fert at hava tætt samband við starvsfólk á stovninum og fært ein týðandi leiklut í at tryggja, at TAKS hevur góðar og álítandi KT-loysnir.
Tú fert millum annað at:
veita KT-support til starvsfólk
uppseta og viðlíkahalda teldur, telefonir, prentarar, brúkaraprofilar, brúkaraatgongdir o.a.
dagføra stýriskipanir og forrit
arbeiða við innanhýsis samskiftisloysnum
umsita og viðlíkahalda KT-infrastrukturin hjá stovninum, herundir netið
samskifta og samstarva við KT-veitarar
gera og dagføra mannagongdir fyri KT-økið
gera og skriva avleiðingar- og váðagreiningar saman við trygdarfólkinum og dátuverndarfólkinum
Um teg
Vit ímynda okkum, at tú:
hevur viðkomandi KT-útbúgving ella samsvarandi royndir
hevur royndir við KT-support, herundir við teldum, neti og brúkarum
hevur fakligt forvitni og lætt við at seta teg inn í nýggjar skipanir og arbeiðsgongdir
kanst arbeiða við bæði fólki og tøkni
ert fyrikomandi, hevur gott tænastusinni og arbeiðir sjálvstøðugt og ábyrgdarfult
dugir væl føroyskt og enskt, bæði í skrift og talu, og kanst greiða frá KT-viðurskiftum, so at bæði fakfólk og ikki-fakfólk skilja innihaldið
hevur koyrikort og reina revsiváttan
Setanarviðurskifti
Talan er um fast fulltíðarstarv, sum verður sett skjótast gjørligt ella eftir nærri avtalu. Starvið verður lønt sambært sáttmála millum Fíggjarmálaráðið og Starvsfelagið í lønarflokki 3 ella 4, alt eftir útbúgving. Starvsstaðurin er í løtuni TAKS í Havn, men setanarøkið fevnir um alt TAKS og kann eisini fevna um Fíggjarmálaráðið og stovnar undir tí.
Send okkum umsókn tína
Tú søkir starvið við at trýsta á Søk nú, har tú skrivar kontaktupplýsingar og viðheftir umsókn, lívrensl, prógv og onnur viðkomandi skjøl.
Umsóknarfreistin er 25. mai 2026
Vilt tú vita meira um starvið, ert tú vælkomin at seta teg í samband við Dianu Gilstón, deildarleiðara, á 35 26 00 ella á dg@taks.fo.
Vilt tú vera við til at styrkja tolleftirlitið við føroyska landamarkið?
Brúka møguleikan og søk nýggja starvið sum átaksleiðari á tolldeildini hjá TAKS.
Tú verður ein lyklapersónur í okkara eftirlitsarbeiði
Sum partur av eini vælvirkandi deild ert tú, við fakligari dygd, góðum samstarvi og røttum amboðum, við til at skapa eitt nýmótans og effektivt eftirlit. Tú situr við borðið, tá ætlanir verða lagdar, og ert við á feltinum, tá tær verða settar í verk.
Arbeiðsuppgávur
Høvuðstættirnir í arbeiðinum eru at:
- seta mál og fylgja teimum upp
- gera váðametingar og eftirlitsætlanir
- samskipa og luttaka í átøkum og eftirlitum
- tryggja dygd í skjalfesting og frágreiðingum
- samstarva við føroyskar og útlendskar myndugleikar og áhugapartar
Útbúgving
Vit ímynda okkum, at tú hevur miðallanga ella hægri útbúgving, til dømis innan:
- kriminologi
- dátugreining
- verkætlanarstýring ella
- samskifti og leiðslu
Onnur útbúgving, sum gevur førleika til eftirlits- og greiningararbeiði, er eisini viðkomandi.
Persónligir førleikar og eginleikar
Yvirlit, dømikraft, menniskjakunnleiki, strategiskt hegni og hugur at læra eru avgerandi eginleikar fyri, at uppgávurnar verða loystar væl.
Tað er ynskiligt, at tú:
- samskiftir greitt, munnliga og skrivliga
- dugir at raðfesta, útdeligera og loysa uppgávur
- kanst arbeiða bæði sjálvstøðugt og saman við øðrum
- vísir hógv, ert fyrikomandi og skapar álitisfull sambond
- hevur áhuga fyri nýggjari tøkni, til dømis vitlíki og dátugreining
Tað er krav, at tú:
- ert sálarliga og kropsliga væl fyri
- hevur koyrikort og reina revsiváttan
- tosar og skrivar føroyskt, danskt og enskt
- vísir trúskap móti galdandi lógum og forskriftum
Kunnleiki til verkætlanarstýring og dátugreining, til dømis Power BI, er ein fyrimunur.
Tú fært
- eitt spennandi og ábyrgdarfult starv við stórum týdningi fyri handil og tryggleika í Føroyum
- góðar møguleikar at menna tínar førleikar innan samskipan, eftirlit og verkætlanarstýring
- eitt vælvirkandi arbeiðspláss við dugnaligum og hjálpsomum starvsfeløgum
Setanarviðurskifti
Talan er um fulltíðarstarv, sum verður sett 1. mai 2026 ella eftir nærri avtalu. Arbeiðstíðin er 39,5 tímar um vikuna, vanliga millum klokkan 8 og 16. Tú mást tó eftir tørvi kunna arbeiða uttan fyri vanliga arbeiðstíð.
Starvið er lønt sum tænastumannalíknandi starv í lønarflokki 31 eftir sáttmálanum hjá Tænastumannafelagnum.
Høvuðsstarvsstaðurin er hjá TAKS í Havn. Starvsstaðurin kann tó vera skiftandi, tí tollarar hava arbeiðsuppgávur kring alt landið. Setanarøkið er TAKS og fevnir eisini um Fíggjarmálaráðið og stovnar undir tí.
Umsóknarfreistin er 22. mars 2026
Søk starvið við at trýsa á Søk nú, har tú viðheftir umsókn, CV, prógv og viðmæli.
Fá meira at vita um starvið við at venda tær til Birtu Biskopstø, deildarstjóra, á 35 26 00 ella á bib@taks.fo.